Po t'i zhvishje veten, vetes?!

Sa dyer ka shpirti yt,
Me thellësi zhgënjimesh,
Përpjekje dorëzimesh
Që ke frikë mos i hap kush?

Sa zhurmë ke brenda vetes,
Me zëra që s'pushojnë,
Rrëfime që lëngojnë
Që ke frikë mos i dëgjon kush?!

Sa frikë ke nga vetja?
T'i vizitosh dyert që secilit ia mbyll,
T'u përgjigjesh zërave që i hesht
Ta luftosh frikën që nga vetja të zhvesh?
Po çfarë ndjen kur ia zhvesh veten, vetes?!